將於嚟緊7月抵港嘅新版歐寶Corsa，早已備受一眾車迷注目；新車無論賣相及車廂陳設，都要較原有型號來得優勝，而率先抵港嘅Corsa1.4型號，其90匹馬力輸出更係冠絕同儕。今趟台灣之行，雖然用作測試嘅只係當中1.2Elegance型號，但喺一套5前速Easytronic半自動波箱嘅輔助下，仍可予人有不俗嘅性能表現。究竟新版Corsa重有何吸引地方呢？有興趣嘅朋友不妨留意吓喇。
特約記者、攝影：陳啟忠
原先嘅歐寶Corsa，經已給予筆者有一份得意可愛之感；但當親眼見到新版Corsa後，就覺得新車來得更富時代感，當中一對頗有神氣嘅頭燈，響流暢嘅車身線條襯托下，就最能夠將呢個特點展露出來。同時，高置式尾燈設計不但能給予尾隨駕駛者有明確嘅提示外，亦能為新版Corsa添上一點新鮮感呢！
或者大家會覺得，一部小車嘅車廂空間定會來得狹窄，而筆者亦有相同嘅概念；但鑽進車廂後，就徹底地將呢個概念消除。皆因新版Corsa嘅車廂空間，較其他同級對手來得寬敞，就算擠滿乘客仍能予人有鬆動之感；另一方面，尾廂空間亦見充裕，遇有需要時更可將後排椅背放平，以便在車內提存儲於尾箱嘅物件。
設備配搭又見齊全，除前後排以絲絨鑲嵌而成嘅座椅，予人有十足承托力外，電天窗配搭，更可給予乘客有更多親近大自然嘅機會；中控台嘅布局亦見簡潔，當中除備有高級音響及原廠冷氣外，四周更鑲有電鍍裝飾，而頂端更備有行車電腦顯示，資料豐富又易讀。當中不可不提嘅，就係新車一套冷氣系統，喺三十多度嘅高溫下，仍能為車上乘客提供一個清爽涼快嘅乘車環境，實在值得一讚。
由於用作測試嘅Corsa，只配有一台1.2公升直4DOHC引擎，馬力輸出只有75匹（率先抵港嘅1.4公升型號，則有90匹馬力），雖然動力輸出充裕，但略嫌欠缺一份爆炸力；而一套5前速Easytronic半自動波箱，不但能給予你有駕駛自動波車嘅方便外，亦能給予你有操控手波車嘅樂趣。實際操控方面，以Easytronic半自動波箱嘅全自動模式喺鬧市中行駛，可謂最適合不過；但行走山路時或會予人有力不從心之感，當改用手波模式操控後，車子嘅表現立即改善，而且重能夠有一份柔韌有力嘅表現㖭。
正當小記一行人，喺台灣著名嘅陽明山上拍攝途中，有一對情侶主動向我們查詢關於新版歐寶Corsa嘅資料；其中謝先生覺得新車嘅外形不俗，車廂布局及裝潢亦極具吸引力。另外，謝先生亦關心新車所配用嘅1.2公升引擎，以及一套5前速Easytronic半自動波箱表現如何，而且重追問何時有售呢！
優點：渾圓造型吸引富魅力外，車廂空間闊落，設備配搭齊全亦為賣點之一。
缺點：一台5前速Easytronic半自動波箱，喺全自動模式時表現較弱，而懸掛設定亦略嫌偏軟。
引擎：1199cc直4DOHC
馬力：75ps/5600rpm
扭力：11.2kgm/4000rpm
傳動：5前速Easytronic半自動波，前輪驅動
懸掛：（前）麥花臣支柱（後）拖曳臂
制動：（前）透氣碟（後）鼓式
輪胎：175/65R14
尺碼：3817×1646×1440mm
軸距：2491mm
車重：1035kg
估計售價：約港幣11萬起
查詢：福方汽車（29888080）