謝賢（四哥）和兒子謝霆鋒今日將會度過一個特別的父親節，因為霆鋒明天就要為涉嫌串謀妨礙司法公正案件而再度出庭。問他想怎樣過父親節，四哥笑言想跟牌章不高的霆鋒搓麻雀，趁機贏霆鋒的錢，並囑兒子以後要生性做人。
謝賢（四哥）表示今天的父親節，子女未有計劃跟他怎樣度過，但四哥尊重子女的決定，一於由子女做「揸弗人」。不過四哥表示希望霆鋒可和他攻打四方城，他更想在父親節當日，跟霆鋒說句：「生性啲啦！」
霆鋒明日再度出庭，問到四哥的心情是否複雜，四哥昨日在灣仔君悅酒店接受訪問時說：「我嘅心情冇乜特別，因為呢件事（指謝霆鋒涉嫌妨礙司法公正案）始終都要面對，我會同霆鋒一齊面對。況且嗰件都唔係乜嘢大事，後生仔跌吓會學識更多嘢。」
近日霆鋒大多足不出戶，問四哥何不叫霆鋒陪他搓麻雀，四哥說：「佢唔同我打牌㗎，因為我叻過佢！」既然霆鋒的牌章不及四哥，那跟霆鋒落場搓麻雀，四哥豈非可贏個盤滿缽滿？四哥笑說：「霆鋒打牌唔叻，但呢個提議幾好喎！」四哥謂一切慶祝活動要看霆鋒的工作安排，但女兒謝婷婷卻為了與四哥過父親節，延遲回加拿大。其實四哥的愛駒「遊戲人生」今日出賽，他應亦會到馬場湊熱鬧。
四哥一向沒有節日觀念，他說：「父親節年年都有啦！兩父子相處得開心，咁日日都係父親節，我覺得同拉姑（狄波拉）離婚後，每逢大時大節，我就最寂寞。」
今天是父親節，問四哥有甚麼語重心長的話要告訴霆鋒？他說：「都冇乜嘢，想叫佢生性啲啦。霆鋒近年嘅經歷，令佢長大咗好多。我承認佢係反叛，但佢冇做壞事。要喺呢個圈生存，真係要學識做人，我自細已對霆鋒施行胎教！」
四哥又謂今時今日已無慾無求，他說：「當年我出道一帆風順，𠵱家最大嘅壓力係同自己講千祈唔好衰收尾。」
四哥昨日親自駕駛了他的古董積架房車來做訪問，他說：「想當年我都鍾意改裝汽車，但𠵱家啲款都跟唔切，我都冇同霆鋒切磋車技。」
身為兒子的謝霆鋒昨日趁着父親節前夕，特別寫了簡單一句「Thanks!」（多謝）給四哥，以感謝父親為他近日惹官非而頻撲，霆鋒昨日說：「我平時好少做呢啲嘢，但係阿爸近排為我件案好頻撲，我真係好多謝佢，但又唔知寫啲乜好，一句英文多謝就正好代表我嘅心意。」
採訪：比華利
攝影：仇志中