富爸爸百忙中，堅持要司機把孻女帶來，給他望一眼，窮爸爸只要可以帶女兒到公園滾泥地玩得忘乎所以，便足以抵銷生活的千斤重壓……有錢與無錢的家庭，同樣最重視父女相聚一刻的溫馨感覺。在父親節的今日，為人子女者請講一句：「FatherandmotherIloveyou（爸爸媽媽我愛你）！」就是這五個英文字的第一個字母，構成了Family（家庭），爸爸排頭位。
何超儀生長在富貴顯赫的賭王家族，且身為孻女，所以連她自己都承認，從小被父親寵溺縱壞，變為一個扭橫折曲、無中生有的刁蠻公主。儘管其父何鴻燊每日忙於打理賭業王國，但父親始終是父親，百忙中都會想盡辦法，多看寶貝女一眼。
何超儀回想起童年歡樂時光，笑得很甜蜜：「嗰時我重好細，記得工人姐姐同我講，話爹哋好錫你㗎，不過佢好忙，冇時間返屋企。所以工人姐姐就抱住我，車咗我去爹哋做嘢嘅地方去見佢。可能係我細個嘅樣太可愛啦，既男仔頭又係孻女，老竇永遠係最縱我嘅。」
何超儀形容，父母在家中的「角色」劃分得清清楚楚：爸爸是好人，要外出工作；而媽媽（二姨太藍瓊纓）就是壞人，負責照料和教導五個孩子（何超瓊、何超鳳、何超蕸、何超儀、何猷龍）。何超儀這個百厭星，永遠由母親出馬收服。
何超儀說：「（細路仔搶玩具俾媽咪鬧）老竇喺呢啲時候插手嘅話，媽咪就會鬧埋佢。爹哋通常縮縮膊，伸伸脷，笑吓笑吓就走咗去。媽咪對我哋惡起上嚟，爸爸係冇得理㗎。不過，媽咪只係對我哋嚴，從來唔會有體罰。媽咪會罰我哋跪祖先、罰抄、唔畀睇電視。總之喺屋企入面，媽媽負責做衰人，爸爸就做好人。」
「雖然平日我哋見老竇嘅時間唔多，但每逢星期日都係我哋嘅familyday（家庭日），到𠵱家我哋都係咁，一家人盡可能坐埋一齊食餐飯。」
「過往嘅父親節，我哋每年都係幾兄弟姊妹同爸爸食餐飯。我記得有年父親節，我哋坐船去鯉魚門食海鮮，食到都唔知幾多點，啲客人已經走晒，剩番我哋一張枱。成間食肆有好多烏蠅飛嚟飛去，但我哋係傾到好高興，有烏蠅都唔理。」
何超儀稱，每年父親節都會由大、二、三家姐負責買禮物，五兄弟姊妹則一同夾錢。雖然賭王有四位太太，但父親節的晚上，必定會留給何超儀和何超瓊等這五個孩子，好好吃一餐溫馨愛心飯。
今年選購父親節禮物仍由家姐負責，何超儀親自寫了一封《給爸爸的信》：「爸，我已經長大了，你不必擔心我，也請你不要盡信人，我們之間的默契，才是最值得信任的。」短短幾行字，盡訴了對父親的心底話。
何超儀說：「我做呢個行業，比較易惹是非。從前爸爸好難明白，我做歌手嘅反叛形象係公司設計，未能做到佢心目中嘅千金小姐、大家閨秀。我最初入行嘅時候，溝通能力唔係咁好，講說話一嚿嚿，同爸爸嘅衝突比較多。但𠵱家自己成熟咗，我哋反而冇晒代溝啦。𠵱家我同爸爸係好有默契。我哋似兄弟，唔使講㗎啦，一個眼神就交代晒，一切盡在不言中。」
記者：朱芷瑩