鄭伊健自戀上梁詠琪（GiGi），與邵美琪分手後，似乎交上了厄運，投資物業蝕掉千多萬，事業又陷於低潮，但鄭伊健將一切視為人生經歷，無怨無悔，在女友GiGi支持下，他期待一部好戲，讓他找到人生的第二個高峯。
三十四歲的鄭伊健，由八七年加入無綫藝員訓練班開始，星途一直很順利，加上他與邵美琪（Maggie）相戀時，曾公開向女方承諾會一生一世照顧她，當時伊健贏得不少女fans讚他深情；但幾年後亦因為同一番話，惹盡不少fans反感，因九九年伊健戀上梁詠琪（GiGi），令他背上負心漢之名，他的事業亦陷於前所未有的低潮。
伊健說：「我唔會後悔當初公開所講過嘅承諾，因為當時我講嘅時候係發自真心，嗰陣我的確好想照顧所愛嘅人一生一世，當時我夠膽咁講，係因為見到爸爸同媽咪由初戀到結婚，就算到𠵱家仍然咁恩愛，所以我係深信呢個世界有白頭到老。但我終於明白每個人際遇唔同，自己都諗唔到會失手。不過兩個人喺埋一齊，一定要雙方一齊去維繫，要兩個人同時堅守嗰幅牆，先至唔會有事，但可惜……
「將來我一樣會對自己所愛嘅人有愛的承諾，只不過我唔會再公開講，因為同一番話，原來喺唔同年份，可以有唔同效果。有人覺得我當初同Maggie分手，然後同GiGi拍拖，喺成件事上交代得好失敗，如果以事業上同經理人角度去睇，可能係做得唔好，但以一個唔想傷害人嘅角度去睇，我唔認為有做錯，畀我再選擇一次，我一樣會咁做。」
其實早於九九年初，伊健與Maggie之間已出現問題，雙方也曾提出過分手，但這麼多年的感情也不是說分手就可以一刀兩斷，直至伊健開始對GiGi有感覺，他才決斷地搞清跟Maggie的關係，然後始正式追求GiGi。
但當時伊健曾答應Maggie對兩人分手事秘而不宣，所以後來他與GiGi拍拖被踢爆後，男的背上負心漢之名，女的就負上狐狸精惡名，當時他的確保護了舊愛，但對自己和新歡卻造成很大傷害。
他說：「呢件事都告一段落，重有乜嘢好講。我同GiGi都捱過呢段日子，嗰陣我真係冇諗過件事會搞到咁大，當初結束咗一段感情，然後去發展一段新感情，真係冇諗過連拍拖嘅事都要同公眾交代。咁多年嚟，我都唔算多緋聞，因為我唔容易投入一段新感情，點知一次就已經大大鑊。」