做人好似踢波一樣，輸咗唔緊要，最重要係唔好輸唔起。好似中國國家足球隊喺今屆世界盃成為「三零部隊」出局，竟然傳出有國足主將打假波，重話中國因為咁先至輸波！
據網上流傳，一名喺中國國家隊德高望重嘅球員，因為好賭欠下巨債，只要佢喺第一場世盃賽，對哥斯達黎加時令中國輸波，賭債就會一筆勾銷；結果佢成場波不時犯錯，最後中國輸咗○比二。
呢段咁嘅消息係真定假重有待求證，不過計我八方話，九成係假嘅，因為八方同事喺南韓西歸浦中國嘅集訓現場所見，嗰位球員真係受傷，隻腳重紮到豬蹄咁，連之後嘅操練都操唔到，唔似打假波。
其實，有咁嘅假消息就印證咗「賭仔姓賴」呢句說話。因為早在中國輸咗畀哥斯達黎加之後，已經有人傳話哥斯達黎加嘅前鋒雲祖柏服用禁藥，令到戰果可能會取消，事後證明係流料。
另外，可能因為中國喺今屆世界盃決賽周三場分組賽全部輸晒，連一球都入唔到，有人輸唔起，想搵啲藉口安慰吓自己，話畀自己聽其實國足嘅實力唔係咁差啩！
傳真︰2623-9278
電郵︰