噚日南韓對葡萄牙一場波對當地人嚟講，就如自己結婚喜慶既大日子，喺漢城市面街上走走，隨處可見着上紅色T-shirt、準備去打氣嘅球迷，為咗感受南韓人呢份對國家隊熱誠嘅精神，小記即刻買件着上身，做住一日「紅魔」支持者。
從漢城市最旺嘅明洞，向即將舉行球迷大集會嘅光化門方向走，沿途有好多攤檔販賣BeTheReds紅色T恤，每件只售四十零蚊港紙，大受歡迎。當然紅色頭巾、南韓國旗亦係球迷恩物。而部份店舖為吸引顧客，特別派出專人在門前免費為球迷畫花臉；不過，對於像小記般港球迷持保守打氣觀念，一件紅色T-shirt已經係極限。
講真，自己擁護嘅係葡萄牙，但嚟南韓採訪接近一個月，對當地文化由之前全無認識到宜家有些少了解。眼見南韓球迷擁護嘅國家隊能夠與歐美球隊抗衡，都會為佢哋嘅成績而高興，可能大家都係亞洲人，加上今屆世盃亦開始證明十六強唔再係歐洲及南美球隊嘅天下，亞洲及非洲足球亦總有出頭一天。