南韓對葡萄牙呢場大戰嘅門票售價被炒高至原價嘅五倍。據悉，黃牛黨將原本售七萬六千八百圜（約四百八十六港元）嘅門票炒至五十萬圜，而十九萬二千圜嘅高價票，亦被炒至七十五萬圜。
雖然比賽喺當地時間晚上八時半先開波，漢城市民早在晏晝三點已經出動，喺廣場大電視前面霸定位等睇波，主辦單位當然唔想悶親佢哋，安排歌星表演同練習定打氣口號，咁幾個鐘就好易過啦。
比賽嗰兩個鐘，漢城幾乎等如死城，就算旺街亦完全冇車冇行人；塞車一向係漢城死症，政府又唔知會唔會安排更多比賽疏導交通。
贏咗波，漢城就有九百萬人通宵慶祝，市政廳、光化門等市中心人頭湧湧，而南韓人更信心爆棚，有人就話就算對意大利亦一樣可以打贏佢，亦有人話南韓必入八強，不時更聽到一大班球迷齊齊大叫「南韓第一、軒迪克第一、亞洲第一」嘅口號。