今明兩日有兩個節日，都係發展商促銷嘅良機，除貨尾盤提供優惠外，太古同新地合作發展嘅將軍澳維景灣畔，就揀禮拜日父親節舉行徵文比賽頒獎禮，太古馬淑貞同新地蘇仲強都會出席。
嘉里深井縉皇居響5月中開始，舉行代理銷售比賽，中原以65%市場佔有率贏出，前晚發展商設宴請中記同事食飯，嘉里朱葉培同時頒發佣金同獎金，金額達198萬元。中記兩個經理亦攞埋縉皇居最佳銷售經理冠軍同季軍。
由於一二手交投響6月份開始放緩，代理要更落力先做到生意，中原錦綉分行黃春華就話，啱啱促成錦綉花園河北街雙號屋成交，單位已放售3個月，其後在大幅減價下終獲承接，但因業主身在上海工作，中原為做成生意，不辭勞苦北上搵佢簽約，最終成功以221萬元成交。
鴻運早前原本搞馬灣環島遊，等同事可以睇睇珀麗灣，但遇上天雨改期至噚日，聽佢哋講公司至今已收到超過100個有關查詢，主要係想買入作長線投資。
蘭西