好多人啱啱先打完PS2隻《超級機械人大戰Compact》冇耐，估唔到最新作《超級機械人大戰R》會喺8月2日推出，今次戰場改為GBA，機戰迷記得留意喇！
講開GBA，上星期提過嘅GBA內置燈主機，坊間部份舖頭已經有得賣，鐵人測試過呢款名為AfterburnerBacklitKit嘅發光板，經專業師傅裝上後，出來嘅效果比想像中好，螢幕光度比以前世嘉嘅GameGear更好，耗電量亦冇想像中咁多，正常2粒2A電可以支持到10小時左右，主機連加燈售約$900左右，比較昂貴，但GBA可玩3-4年，計落又唔算太過份，有興趣不妨去灣仔188商場睇吓。
炒到㷫烚烚嘅PS2HardDisk，隨住日本再派貨而大幅回落，最新行情PS2型號30000及35000主機用內置HDD約售$1,680，舊型號10000，15000，18000用嘅外置HDD則售$1,700左右，但留意暫時行貨主機未能使用HardDisk。另外日本Logicool隻型仔PlayonlineKeyboard就啱啱到貨，現價約$650左右，呢款Keyboard同之前IODATA推出嘅，最大唔同之處在於前者左右兩邊配上PS2嘅方向鈕，咁玩FFXI時自然方便好多，有FFXI嘅朋友不妨留意。
Bandai自從公布SwanCrystal喺7月12日推出之後，意味舊款WonderSwanColour即將被淘汰，好多行家都趁新機未出前及早散貨。鐵人近日見過WSC賣$350左右，重要有遊戲送，咪話唔抵買，行貨SwanCrystal就會與日本同日發售，零售價未定。
TECMO用《DEADORALIVE》班性感女角做嘅排球遊戲，喺美國E3遊戲展令人有深刻印象，呢隻XBOX遊戲就要等到暑假先有得玩，不過冇XBOX嘅GC玩家唔使失望，7月18日由SEGA製作嘅《VirtuaBeachVolleyballBeachSpikers》，亦會由一班比堅尼女郎性感上陣，除完全移植街機版本，更加上原創系統，定價6,800日圓（約港幣$420）。
文：打機鐵人