台灣青年偶像F4，成為一向嚴肅嘅《國際先鋒論壇報》（亞洲版）嘅頭版新聞，令左丁山嚇咗一驚。IHT唔係《蘋果日報》，乜咁搞法？睇真啲，原來F4橫掃台灣，征服香港之後，最近走咗去上海，令到上海少女瘋狂，朝早五點就去機場等F4到達，驚動五千名公安戒備，於是引起IHT大做文章，認為中國人「棄毛投F4」。諗落係搵嚟講，二十歲嘅上海少女重邊會記得老毛吖，佢哋阿媽先至識唱「爹親娘親不如毛主席親」啫。
指住IHT問靚女康妮：「識唔識F4？」康妮大笑：「不如我問你識唔識朱維德、李香琴？」咦，美少女點會知道朱、李呀？康妮話：「上星期日陪一啲長者去馬鞍山參加一個房屋協會主辦嘅『長者安居樂逍遙』嘅康健活動，地方就喺樟木頭老人度假中心，過咗烏溪沙唔係好遠就到。二百五十名長者喺中心內玩茶藝、草地滾球、絲襪花、粵曲、跳舞等等，玩得好高興，房協高層LCWong亦在場同啲長者玩埋一份，非常開心。但你估啲長者見到邊個最高興呢？我第一次見到朱維德、李香琴兩位長者，啲老人家見到佢兩個就嗒晒糖，圍住佢哋團團轉，猛咁影相，就好似我摸到F4手仔咁高興，令到現場二百幾人充滿歡樂氣氛，房協真係諗得到。」
朱維德、李香琴怕有×十歲嘞啩？估唔到仍然對長者咁有號召力，可算係長春藤，輪到康妮做長者之年，F4重會唔會吸引佢呢？