世界盃已經踢咗四分之三賽事，今日起每日就得兩場賽事咁大把，你嘅策略會係點呢？分開兩回合逐場玩亞洲盤，第一場中咗就冧落去第二場？其實今日兩場波嘅半場和局味道都好濃，不妨考慮一下半/全場二串一呢個選擇！
𠵱家每日都只係得兩場波，普通歐洲盤過關分頭唔多，加上「焗揀」就好似更加無癮頭；其實要玩過關，都可以試吓其他瓣數嘅，例如半/全場就會係呢個時候嘅一個唔錯選擇，分頭比歐洲盤多，呢類二串一就最啱數。
今日兩場分別為德國對巴拉圭，以及丹麥對英格蘭。第一場我就認為兩隊喺半場好大機會打成平手，事關嚟到淘汰賽階段，啲球隊都唔敢太過急攻，以免顧唔到個後防俾人突襲得手，就會處於下風好大機會出局；尤其德國呢類好懂得沉着應戰嘅球隊，都幾難望佢哋會一開波就空群而出搶攻。
巴拉圭上一場對斯洛文尼亞時反敗為勝，後勁凌厲，今場波隨時又係唔使同你急，等到下半場至發難；咁樣嘅話，半場真係好大機會開個和。
至於丹麥對英格蘭，我又係覺得好大機會會和局完半場。今屆賽事英格蘭嘅後防表現唔錯，佢哋喺三場分組賽都只係失咗一球，呢個成績應該足以喺丹麥身上保持半場不失，當然重要博埋佢哋半場都搵唔到入波機會啦。咁樣二串一，就算你揀次熱嗰瓣「和/A」（即下半場德國同英格蘭贏）互串，都起碼有二十倍過外分頭！
文：華度