美國周四公布零售數據較市場預期差，加上朗訊發出盈利警告，杜指及納指分別下挫1.2%及1.4%。點知噚日又發生美國駐巴基斯坦卡拉奇領事館遭汽車炸彈襲擊，外圍美股期指進一步急跌，同時亦影響亞洲區股市普遍大跌。香港本身亦發生沙田馬場炸彈事件，或多或少令投資者出現戒心，恒指最後大跌163點，收10955，11000關宣告失守。
收市後，外滙基金投資公司宣布下季出售80億元盈富基金（2800），呢個金額係市場預期下限，對大市屬中間偏好消息，如近日突發嘅利淡因素能夠迅速消化，以港股目前超賣嘅情況，大市再跌幅度應該有限。
恒指今個禮拜共跌329點，跌幅2.9%。恒指5月喺12000以雙頂回落，已經連跌4周，回吐超過1000點，估計10800水平會有支持反彈。趙飛雲睇埋噚晚美股走勢，就會定出下周策略，10800至11000區域應該係一個具值博率嘅買貨區。
鞍鋼（347）噚日跌至10日線1.23元反彈，最後跌2仙，以1.25元收市。本周走勢以整固為主，下周估計將有突破，仍以1.19元作止蝕位持貨上望。下周打算在1.9仙至2仙區域先買1注御泰（155）。
趙飛雲