谷祖琳同二人男子組合Shine前晚喺香港遊艇會，出席「NauticaBikiniBBQSummerParty2002」活動，佢哋三個重着便服同沙灘裝行騷。而馬德鐘係大會監督，佢嘅好朋友張可頤、趙學而、謝天華、薛家燕同埋佢兩個仔女都有去捧場。
谷祖琳本來會着泳衣行騷，但係臨場先發現件泳衣唔啱身但又冇修改過，所以最終佢冇着到，佢重話：「性感係在乎人哋點睇啫。」而Shine的成員徐天佑行騷時，見佢單手插袋，事後天佑話：「條褲好鬆，我伸手入袋捉緊褲頭唧。」
而張可頤就話最近財務公司有人打電話追佢數，佢話：「原來係我屋企個菲傭借咗錢唔還，佢借錢時報咗我個地址，我即刻炒咗個菲傭啦，我重發現唔見咗部相機㖭。」
韓國變性紅星河利秀日前接受台灣報章訪問，佢話諗住三年後同男友拉埋天窗。河利秀一講到佢男友就甜絲絲，話兩個人拍拖年幾，男友𠵱家喺大學主修芭蕾舞。由於男友太靚仔，搞到河利秀好驚男友俾人搶走。河利秀重話好想生BB，但係冇可能啦，所以佢諗住婚後收養細路，一嘗做媽咪嘅滋味。
陳小春大前日喺日本大阪睇世界盃英格蘭對尼日利亞嘅比賽。當小春去到大阪機場，重有好多日本歌迷嚟接機，佢哋送咗好多有關世界盃嘅紀念品畀小春，小春重用日文講多謝㖭。小春睇波之餘，佢重喺塊面度畫上英格蘭嘅標誌，以示支持。小春話呢次睇波，最威水係可以俾官方攝影機影到，全球曝光㖭。
吳倩蓮早前自己走咗去葡萄牙同西班牙旅行，一玩就玩咗二十一日。原來佢之前幫韓國拍嗰部電影《維納斯》，一時改劇本，一時又要換人，搞咗成年都未拍得晒，小倩咪去旅行散心囉。小倩話𠵱家感情生活一片空白，至於早排佢同李宗盛傳緋聞，佢話係黐線喎。
郭耀明噚日出現無綫電視城，馮仁昭見佢眼紅紅，重以為佢發生乜嘢事。原來早幾日佢做咗個激光矯視手術，重未完全康復，所以兩隻眼重有好多紅筋。
郭耀明同馮仁昭講幾句就急急腳走，事關佢今日要去外地做嘢，要趕時間去醫生度覆診。
英皇二人組合Twins嘅蔡卓妍同鍾欣桐首次合作拍嘅新片《這個夏天有異性》噚日第一日上畫，聽講話旺角百老滙戲院噚日有人龍排隊買飛睇戲，而第一場兩點半嘅票房已經有十八萬，所以電影公司估計噚日票房應該可以過百萬元，而寰宇電影公司老闆林建岳都話對呢套戲好有信心喎。