頻頻集資嘅華多利（1139），最近兩日成交多咗，不但股價有異動，兼且見到炒家搭晒棚，好似買家好踴躍咁款。小初問經紀陳點睇，佢話唔使理咁多，只不過係有個炒家興風作浪而已，而且個炒家向來胃口細，一炒高就出貨，好快會玩完。
華多利確實係奇怪，佢集資行動多，批完股又供股，供完股又批股，但次次集資額都係細眉細眼，只得幾百萬銀。好似5月底咁，公司以每股11.5仙，配售4400萬股新股，集資淨額只得450萬元，稍為有實力嘅炒家，都可以一個人坐晒。
由於新股就快出籠沽得，家陣先搭棚做靚個價，自然方便日後出貨，情況就好似上次供股，成批貨由一個炒家坐晒，股價由10仙mark到上去20仙樓上，當時一樣謠言四起，但結果都係完全冇料到。
唔怪得經紀陳睇都唔睇，就話一定冇料到，重叫小初慳番啖氣暖下肚好過。
慕容小初