唔怕塞軍兵殘照玩「守籠」
世盃求驗客：迪奧夫唔理大局

我求大俠真係服咗塞內加爾前鋒迪奧夫，佢明知自己隊波喺十六強對瑞典時，幾乎肯定冇咗四件主力（戴奧、法迪加停賽，A施斯同埋高利有傷），但竟然夠膽喺前日球隊操練時做龍門。係人都知巴西隊長艾馬臣就係因為貪玩喺操練時守龍門，結果膊頭甩骱，連世界盃都冇得踢。
點知迪奧夫話：「我一直都想做龍門㗎啦，我嘅把關技術重唔錯㖭！至於艾馬臣因為咁樣而冇得打世界盃，我完全唔知有咁嘅事噃！」我行我素唔係唔好，但有時都要顧全吓大局啩。

德國佬玩工心計一流
各位球迷有冇留意，德國球星波勒每踢一場世界盃比賽之前，總傳出佢呢度傷嗰度又傷嘅消息，而且重整到成班波因佢缺陣而冇心機；但係結果佢都係出得，而且龍精虎猛，甚至有入波。我求大俠就認為呢件事係德國人最鍾意玩工心計的最佳證明，睇住啦，佢今日一定會上陣對巴拉圭。

意軍贏波家眷獲宿一宵
「金童」迪比亞路前晚入波做咗英雄，賽後佢承認懷念去世嘅爸爸外，最掛住係女朋友。而意大利教練查柏東尼亦體恤班球員，特准球員老婆同女友到球員入住酒店過夜──一晚咁多。不過據聞韋利女友無到日本，要一支公過囉。

哨牙度爭射手獎有運
國際足協宣布巴西對哥斯達黎加嘅第一球，係朗拿度入嘅；即係話哨牙仔已入咗四球，有機會做神射手，唔怪得佢嘅神射手賠率，熱到得番三點五倍。喺呢度就要讚吓本報名家華度，佢喺哨牙仔嘅射手賠率有六倍時，已叫大家落飛，早着先機也。