賭王四姨太梁安琪兩年前與好友Tracy於中環開設時裝店「A&T」，昨日記者發現該店已關門大吉。四姨太透露皆因租約期滿，業主不但不肯減租，還要求加租，四姨太認為另找新舖並不困難，稍後才再作打算。
賭王何鴻燊四姨太梁安琪（Angela）除了開設茶餐廳外，兩年前她與好友Tracy以自己英文名字首個字母為店名，在中環開設「A&T」時裝店，售賣歐洲時裝為主，但記者昨日所見「A&T」時裝店已經關門大吉。
記者致電四姨太了解，她說：「係呀，暫時唔做住，我哋間舖當初簽咗兩年約，𠵱家啱啱約滿，本來都想同業主續新約嘅，但係𠵱家市道咁差，佢哋居然斗零都唔肯減，重話要加租㖭。對方企到咁硬，我覺得外面大把舖啦，呢盤生意又唔係搵到好多錢，咪搵新舖再開囉，人哋『Teresa』（指章小蕙的時裝店）都成日搬舖啦。」
問四姨太經營時裝店是賺還是蝕？她說：「到𠵱家都未埋數，未知住。不過呢間舖每個月淨係交租、管理費同人工開支，都要成五萬蚊㗎，我其實冇乜所謂，反正呢啲嘢咁鬼濕碎。」
另外，賭王何鴻燊昨晚在健康快車舞會上，對於四姨太的時裝店關門大吉一事，他說：「咁丟架？佢都唔輸得嘅噃，不過我都覺得佢做茶餐廳生意嗰邊好啲。」問賭王會否預留信德鋪位予四姨太再開舖？他說：「香港咁大，唔一定揀信德啫。」
而四姨太的生意拍檔Tracy亦表示店舖關閉，她可趁機休息，Tracy說：「反正呢間舖都幾困身。」