外圍股市表現差，港股噚日11000關口失守，全日挫163點，收報10955點，成交72億元，反映大市真係有沽售壓力。
港股壓力主要來自政府出售盈富基金（2800），如果唔想繼續受影響，惟有寄望外滙基金投資公司面對現實，盡快沽清盈富，徹底解除呢個威脅。事實上，個市咁弱，盈富基金新一季發售額仍加碼至80億元，或多或少反映到政府明白要盡快清貨，消除投資者心中陰影。
沙田馬場炸彈事件可能會令外資有戒心，因為暫時大家都唔知發生乜事，及日後會唔會繼續發生。
阿虎同Cookie都對英皇科技（283）持觀望態度。不過ｅ莉莎就話入咗少少貨，佢話英皇向買家提供1.5億元短期融資，金額啱啱夠以每股0.25元買起成間公司。若買家要以孖展形式持倉，而借貸額達到1.5億元，股價肯定要升至一個安全水平，保證免受斬倉威脅。
Cookie重話此股長線就唔識睇，但短線就值得一博。𠵱家嘅女人真係勇！
中國糧油（506）傳出即將引入策略性股東。Cookie話目標價睇3元，不過就搞唔清係配售畀策略性投資者嘅定價要3元，還係股價要炒上3元，但無論如何，消息都反映此股可能會再開車。
光通信（603）雖可擺平中國石油天然氣管道局，繼續持有50％中油中泰。但事件反映雙方合作有問題，難再憧憬管道局有好嘢益佢，即使俾佢買到巨川（729），前景都係一般。
阿虎