炒股龍頭光通信（603）即將改名「中華城市燃氣」，聽聞得到強而有力嘅人士力撐之下，終於同大陸方面講掂數，投資天然氣項目唔使取銷，睇怕和黃（013）同埋德祥企業（372）認購嘅可換股票據協議，亦可以如期進行。
或者因為有春江鴨事先知道單嘢搞得掂，所以同係上海幫炒作嘅上海策略置地（164）亦重拾升軌，連升兩日。
如無意外，光通信應該可以喺今日復牌。記得佢上次收購中國發展（487）唔成復牌嗰日，先急跌但其後倒升，腰力何等強勁。
不過，近日掛住睇世界盃，連工都唔返嘅經紀陳，就唔係十分樂觀。佢所持理由甚為簡單，一來停牌咁耐，之前炒家坐落嘅孖展倉，點都要斬一斬倉，加上呢排市場投資意欲薄弱，成交又萎縮，想好似前排炒風咁熾熱，真係唔容易。小初則認為隻股復牌，起碼炒家縳住嘅銀両會鬆番出嚟，對市場其實亦係好事。
慕容小初