近期剛推出不久嘅標緻307SW七人車，吸引嘅裝備同賣價，廣受車迷歡迎之餘，最近代理重引入多款原廠配件，給裝身後嘅307SW更加添有多一份RV消閒意識，又豈止係一部家庭MPV咁簡單呢！
記者、攝影：陳偉林
呢部307SW用上一台2.0公升直4DOHC偈，匹配一套4前速半自動波箱，令行車變得更有樂趣之餘，響高負重下駕駛，亦能盡現引擎每段柔韌有力嘅一面。再者，車子本身穩紮車架及其低重心設計，更帶出呢部307SW順暢嘅循迹行車表現㗎！
唔講唔知，原來法國標緻車廠早就替307SW，設計有多項RV配件同裝備，單係車頂嘅行李架及活動單車架組合，加埋部車本身時尚流暢嘅賣相，令人看來更添活力同新意㗎！
至於車廂方面，原廠一套7張Calipso座椅套配搭，要較原來沉實嘅設計同裝飾，平添有一份色彩之外，另一套AV組合連配件，更可以響塞車嘅環境下，給一家大小暫時忘卻煩囂嘅城市生活㗎！再者，中後排靈活多變嘅設計同組合，座椅可自由裝拆外，重可以加添一個有28公升容積嘅冷熱冰箱，最啱夏日郊遊遠足或野餐露營之用。另外，原車嘅天幕式玻璃車頂連電動遮陽簾，重有原廠高級音響同恒溫冷氣裝備，都係呢部多用途MPV嘅賣點之一㖭！