早前中哥、中巴戰門票大跌價，但今次中土大戰卻止跌回升，前兩次原價近五百港元嘅三等票跌至六十，但今次就冇四百蚊都唔使諗，一位土耳其球迷手持過百張三等票，叫價四百二十蚊，立即被球迷掃清。
國足最後一仗，仍有大批國內球迷到場打氣，可能佢哋知道下屆中國打入決賽周機會麻麻，所以都珍惜「最後機會」，大量購買同中國隊有關嘅世界盃紀念品，一頂印有中國國旗嘅帽索價八十蚊，一樣有好多人掃貨。
國足第三場又吞蛋，可能球迷對佢哋嘅期望已減少，記得對哥斯達黎加同巴西時，完場後好多中國球迷流淚，但今次對土軍輸三球，中國球迷已有心理準備，離場時亦少見哭喪咁款，可能麻木咗？