單親媽媽阿梅與十二歲女兒近日獲分配公屋單位，得以改善居住環境及減輕屋租負擔。可是阿梅自與丈夫因欠債問題離婚後，便倚靠綜援金勉強維持家計，再無餘錢負擔新居的屋租、水電及煤氣按金，亦無力購買基本家具及電器。
四十七歲的阿梅對早前被財務公司追債滋擾的情景仍歷歷在目，面容憔悴的她憶述：「嗰晚半夜我聞到好大陣油漆味，走出廳見俾人喺門罅淋紅油，搞到門口地下濕晒，第二日即刻帶囡囡搬去親戚處住。過咗一排我至敢返屋企，發現大門啲氣窗俾人打爛晒，街坊話先前日日都有幾個男人嚟大力拍門追債，最驚佢哋放火就大件事。」
阿梅的丈夫張先生，五十歲，多年來從事的士司機，育有一名現年十二歲女兒。阿梅歎謂：「我同阿張結婚超過十五年，佢不嬲幾顧家。點知呢兩年經濟唔好，阿張揸的士收入少咗好多，入不敷支，最後搞到周身債，佢粒聲唔出走咗，剩低我同囡囡好彷徨！」
負責跟進阿梅個案的社工稱，為避免阿梅母女的安全受威脅，已協助阿梅辦妥離婚手續。
刻下，阿梅獲房屋署恩恤安排，得以入住屋租較私人樓宇便宜的公屋單位，改善居住環境。
惟阿梅目前僅靠綜援金維持家計，生活已經捉襟見肘，實無力負擔搬遷的龐大支出及購置家具、電器。
「𠵱家屋企張床、衣櫃同雪櫃都係包租婆嘅，我唔可以搬走。另外要應付新屋嘅水電、煤氣、屋租等幾樣按金，加埋要搵人裝光管等雜費，至少要五千幾蚊，唔係小數目。我以前做開售貨員，舊年失業至變得咁手緊。我希望上樓安頓好頭家、過咗呢個難關之後，可以盡快搵到工，做乜都好，唔使同囡囡長期靠政府養。」阿梅坦言。
按現行條例，社會福利署只會向領取綜援的長者及傷殘人士發放搬遷津貼，故阿梅母女除每月獲發租金津貼外，不會獲得當局援助遷居。
蘋果日報慈善基金了解阿梅的情況後，即時撥款六千元，助她應付搬屋費用，紓緩其經濟壓力，另將安排轉送讀者捐出的床、衣櫃及雪櫃給她。
捐款編號﹕C0589
暖流熱線
電話:29908688
傳真:23702192
電郵:
網址：