去年，本港車壇湧現咗多款家庭七人MPV，頓時成為用家追捧目標；而今日《用車報告》主角龐先生嘅座駕——日產Prairie，亦係呢個潮流下嘅產物。龐先生對Prairie闊落嘅車廂空間，以及出色操控表現讚不絕口；究竟佢對Prairie重有何評價呢？有興趣嘅朋友不妨留意一下。
記者：鄭達基 攝影：楊錦文
喺購買日產Prairie之前，龐先生係以一部開篷車作座駕；但因為想喺載同家人出外時，令佢哋可有更寬敞及更舒適嘅乘車環境，所以便產生換車嘅念頭。而龐先生亦曾到各大汽車代理商嘅陳列室參觀，後來覺得日產Prairie嘅賣相吸引之餘，闊落嘅車廂空間，以及左右雙趟門配搭，亦正好符合換車嘅首要條件。故此便於去年以接近18萬嘅價錢，購入現時呢部Prairie作座駕。
另外，龐先生又覺得Prairie不但車廂空間感強，車頂敞大嘅雙天窗配搭，亦可給予車上乘客有親近大自然嘅方便；多變嘅座椅布局，亦能喺郊遊玩樂時提供一個不錯嘅休息地方。而雙趟門配搭除令乘客上落更方便外，兩截式開啟嘅尾門設計，能增強提存尾廂物件嘅方便程度。論操控，Prairie嘅引擎動力輸出充裕，而一套HyperCVT無段變速自動波箱表現亦見出色，令行車更暢順。
而龐先生則認為，可能由於自己以前係以車體較矮嘅開篷車作座駕，故此當駕駛車體較高嘅Prairie時，轉彎嗰陣要來得特別小心，但適應後便可輕鬆地將之駕馭。
由於龐先生嘅座駕進行例行檢查時，多數會返回代理嘅維修服務中心，故未能比較代理與坊間車房嘅維修質素及價錢；但佢認為代理所提供嘅售後服務不論質素及價錢，都屬於可接受嘅水平，值得稱讚。
去年，一眾家庭式七人MPV突襲本港車壇，多款新車先後抵港，而且重有唔錯嘅銷量㖭；其中於去年6月抵港嘅日產Prairie，就係其中一款頗受用家歡迎嘅七人MPV喇。Prairie不但外形突出，雙趟門配搭方便乘客進出車廂外，實用多變嘅車廂布局，亦為新車賣點所在；而代理為吸引買家，喺今年年初更替Prairie增設電趟門配搭㖭。售價方面，喺去年推出時為$158,000起，而現時售價則為$158,880起，相比起其他同級對手來得更見吸引。
如果你係車主，你嘅座駕已落地三個月以上，不論對座駕是讚是彈，我哋都願意將你嘅心聲寫成用家報告，與讀者分享。
郵寄：香港將軍澳工業邨西駿盈街八號《蘋果日報》副刊「車天車地」版「用車報告」收
傳真：27420542
電郵：
（請註明車主姓名、年齡、聯絡電話及車輛型號）