中文大學梁秉中教授做咗十年新亞書院院長，八月就會離任，由化學系教授黃乃正接任。院長做咗十年，梁教授另一項慈善活動──關懷行動，亦已經做咗九年，同一班骨科醫生專門為內地肢體殘障人士免費做手術。
昨日校友同教職員喺港麗擺咗十幾圍歡送梁院長，恒生副董事長鄭海泉猛咁叫八方呢個星期日（父親節）晚上八點半睇無綫，事關會直播關懷行動籌款節目，重話八方實會睇到眼濕濕，因為有好多感人個案。
候任新亞院長黃乃正教授就講笑話，以後大家同金耀基教授傾偈要小心啲，否則好似佢咁，傾傾吓閒偈就變咗做院長。其實院長唔易做，最難就要喺咁嘅經濟環境下，為學生活動周圍「撲水」，惟有面皮厚啲。
轉頭八方又見到另一個校友、警務處副處長李明逵，其他校友一見佢就約打網球，原來李Sir係網球高手，重成日代表「警察網球會」參加公開賽。
（圖）新亞書院院長梁秉中教授（右三）將離任，由化學系教授黃乃正（右）接任。校友李明逵（左三）昨出席歡送晚宴。
傳真︰2623-9278
電郵︰