嚟得踢世界盃嘅國家，都希望可以攞個盃返屋企，但係將會喺禮拜六兩場十六強賽碰頭嘅四支球隊，就互相向對手送高帽，猛咁讚對手。查實佢哋咁做原因好簡單，只係想擾亂對方。
英格蘭後衞李奧費迪南賽前讚丹麥擊倒世界冠軍法國，真係唔可以睇小；而丹麥聽到英格蘭咁講，就讚對方嘅超聯水準高，所以佢哋班波好有實力。至於德國佬重搞嘢，將巴拉圭教練施薩馬甸尼捧上天，話佢啲戰術運用厲害到冇人有；而巴拉圭門將捷拉華見德國咁畀面，又回敬話同德國比賽就好似挑戰歷史一樣。總之一句講晒，你擦我鞋，我又擦番你鞋啦！
但呢啲奉承言論，邊會係佢哋啲真心話，只不過係想擾敵。此外，法國同阿根廷提早出局，令到英格蘭同德國壓力好大，因此都係扮吓死狗，喺賽前留定後路先，萬一喺淘汰賽輸咗，起碼到時都唔會俾人鬧得咁甘。
愛爾蘭響禮拜二打低沙地後，前鋒羅比堅尼即刻俾賽會捉咗去例行驗尿，搞到佢冇機會入更衣室同隊友慶祝，唔怪得佢日前高呼無癮。其實佢響比賽入波後曾經想用機關槍手勢慶祝，咁啱隊友撲埋嚟阻住佢，好彩佢後尾終於有時間作個射箭狀慶祝方式補番數。估唔到一個球員想慶祝吓都咁多阻滯。
國足喺噚日用輸波嚟結束佢哋嘅世界盃之旅。老實講，如果唔係「大頭」李瑋峰喺禁區內賣弄腳法，搞到國足喺開賽僅六分鐘就輸波，我求大俠認為國足到最後未必輸○比三。李瑋峰踢成咁，睇嚟冇乜機會去超聯落班；希望佢今次世界盃可以學到，第日會踢好
人衰行路打倒退，唔能夠帶領法國打入世界盃十六強嘅施丹，連個名都無端端衰埋。事緣警方喺越南某間用施丹個名做招牌嘅咖啡店內，捉到十四個涉嫌非法賭波嘅人。我求大俠就認真替施丹唔抵，因為佢嘅名衰多幾錢重之外，重俾人盜用埋個名，真係無法無天。
賽前重以為巴西噚日對哥斯達黎加會留力，點知佢班球員就鬼咁認真，結果輕取五比二。朗拿度呢場雖然入得一球，但𠵱家都累積到三球，同領先嘅德國高路斯只差兩球。其實巴西教練史高拉利之前話過，希望佢可以一場入一球，最後以七球榮登神射手寶座。