中國隊今次一償多年夙願打入世界盃決賽，結果3戰3敗，失9球未入1球首圈出局，賽果其實並非太意外，只係之前13億中國人太希望有奇迹出現。
中國隊出局令趙飛雲惹起無限聯想，上周日趙飛雲3T過咗頭兩關，帶來發大達嘅無限憧憬，好似中國打入世界盃一樣，可惜最後一關斷咗，只係得番545元安慰獎，確實令趙飛雲極之失望，根本唔敢話畀人知中咗3T安慰獎呢件事。買3T最終目的係贏大錢，而中國隊打入世界盃係要證明中國足球水平達到世界級實力，做1支世界盃決賽三零部隊其實等於中咗545元3T安慰獎一樣，根本唔值得高興，希望未來4年內中國隊能躋身世界足球強國之列，而趙飛雲則喺今個禮拜賽馬煞科日再圓3T美夢。
盈富基金（2800）發售數額今日公布，估計應該唔超過80億元，噚日期指加時階段轉為大幅高水81點，唔知係咪一種啟示？不過單憑盈富嘅消息不足以令大市重展升浪，須有其他好消息配合，否則彈一彈之後可能再散過，估計港股短期會喺11000至11400反幅上落，較明顯嘅升勢可能要喺6月尾至展開，到7月才有機會大翻身。
趙飛雲