呢排若果響青衣城或附近買報紙，會收到印住利嘉閣地產嘅迷你紙巾，原來係由利記送出嚟嘅。聽講利記青衣城分行自費3萬元，訂咗5萬包紙巾，用嚟推廣呢間新行，當然，除咗買報紙有得送之外，響利記分行都有得攞。
地產代理監管局最近出咗兩份刊物，一份係同消委會合作嘅「置業須知」，講解買樓嘅步驟及要注意事項。至於另一本係內地置業須知。
和黃集團今日請傳媒去東莞睇海逸豪庭第二期倚湖名居示範單位，今個月25號就請睇深圳黃埔雅苑示範單位，睇嚟又會掀起另一輪內地樓熱潮。
吉之島百貨進軍內地市場，中山係目標之一，下個禮拜會響當地簽約，租用「君悅豪庭」商場。日後大家到中山玩，行街時會唔會有熟口熟面嘅感覺？
發展商愈嚟愈識得用唔同嘅渠道為樓盤做宣傳，地鐵車廂內嘅電子顯示板就係其中一樣，太古將軍澳維景灣畔三期開賣前都用呢招賣廣告，最近蘭西都繼續見到佢哋嘅廣告，內容就有啲唔同，今次係用一對卡通兔仔做主角，相當生鬼。
蘭西