對大部份香港人來說，雪櫃是家庭必需品，但對於許多貧困長者來說，擁有一部雪櫃仍是遙不可及，八十四歲的曹和生便是其中一人。
「我八十幾歲人，都未試過自己真真正正擁有一部雪櫃，真係好想試吓呢種滋味。」滿頭白髮的曹伯一臉希冀地對記者說。
原籍上海的曹伯，五十多年前隻身離開故鄉來港謀生，先後在工廠、雜貨攤、報館等多個地方工作，惟收入僅足餬口，生活艱苦。「孤家寡人，咁多年都係租嗰套房住，好後期先派到間公屋，有自己嘅地方。」
雖然曹伯終於一償「上樓」的心願，但礙於經濟能力有限，他一直沒有添置甚麼家電用品。「冇法子，搵唔到錢，咪惟有慳慳哋，多餘嘅嘢唔買囉。」及至早年，他年事漸高被迫退休，現依靠綜援金維生，更難滿足需要。
「𠵱家我都冇乜嘢望，最想就係有部雪櫃，方便啲，但冇人幫忙，睇怕都好難成事。」曹伯一語道出眾多貧困長者的心聲，他們正期待善長的回應。
蘋果日報慈善基金與聖雅各福群會合辦「電器贈長者」計劃，乃收集讀者捐出的家庭電器包括：電飯煲、風扇、收音機、雪櫃等物資轉贈給接受綜援或經濟有困難的獨居長者，仍需讀者繼續支持。聖雅各福群會電話：28354321 捐款編號：C0588
暖流熱線
電話:29908688
傳真:23702192
電郵:
網址：