星期一走上FCC（外國記者會）聽文化委員會三位委員盛智文、羅啟妍、林在山講「文化與商業」，三位輪流發言十分鐘，然後接受提問。
呢類話題，通常只會吸引三十零人，點知是日FCC大餐廳坐到爆棚，連陽台都要開埋，經理重話只準備咗一百二十份三文魚，唔夠客人食，問我哋嗰枱肯唔肯轉食龍脷，當然冇所謂之至。
點解咁爆？大概講者有吸引力啩。盛智文係「蘭桂坊」之父；羅啟妍係鑽石珠寶設計師，享譽甚隆；林在山人靚聲甜，報界地位高。佢哋分別論述文化與創意產業、文化與商業、文化與香港等話題，繼由聽眾發問，其中一位英文台記者問及學童藝術教育問題，大意話香港好多細路學音樂，點解香港冇乜音樂藝術氣氛？
林在山答得妙：「香港好多學生學小提琴、鋼琴學得幾好，但問佢哋關於貝多芬嘅小史，就唔識答，而且一到咗中五，父母就要佢哋以學業為重，以後慢慢就唔再玩音樂。」盛智文亦話：「我在美國長大，啲家長如果聽到子女話要做律師、醫生，當然高興，如果仔女話要做藝術家，家長亦唔會反對；但喺香港就唔同，家長只係鼓勵仔女做律師、醫生，反對子女做藝術家！」
佢哋嘅觀察相當準確，香港細路學琴，多數只係滿足大人嘅慾望，而且只學琴技，唔學音樂背後嘅道理。至於學畫畫嘅，更少之又少，香港要發揚文化，要想辦法發揚藝術教育至得。