亞視新任行政總裁陳永棋昨日上晝九點半返亞視同各部門總監開會。新官上任，個個高層都唔敢怠慢，八點幾就蒲頭，只有封小平嘅嫡系張立同新老細差唔多時間返到，佢一見老細部車就即刻上前傍住，重好似想話幫手開車門，點知陳永棋個司機重快手，佢惟有㩒定𨋢傍住老細上寫字樓，真係識做。
可惜，陳永棋開完會後，八方問佢張生會唔會離職，佢初時竟話唔知邊個張生，後來佢先至話：「佢冇同我辭職，我亦冇炒佢。」
陳永棋話噚日開會傾公司政策，同埋介紹新營運總監余統浩畀大家識，陳永棋又重申亞視內部少啲新聞先至係健康嘅電視台，「暗寸」封小平以前多是是非非。
陳永棋又話自己挺董係人都知，不過佢會堅持新聞自由，佢一邊望住八方一邊話：「做新聞唔應有偏袒、歪曲事實、煽動同製造新聞，有啲傳媒係害群之馬，報道新聞應該『執實』。」「執實」即係實事求是咁解。八方好奇問佢係咪講緊邊個，但佢就冇出聲。
另外，鳳凰衛視嚟緊又會有三位高層入主亞視，分別出任企業部、市場營業部同東莞演藝學校嘅副總裁。
傳真︰2623-9278
電郵︰