今年港姐受訓課程有別於以往無綫一開始就要測試佳麗係唔係能歌善舞，有冇演戲天份等等，好似噚日一班港姐就晨咁早喺電視城測試做戲，搵嚟胡楓同埋羅冠蘭做評判，睇吓邊個有表演天份，點知胡楓就話：「未做過嘅就叫過得去，但係好好就唔講得囉！」
其中14號黃珮妍就要做《大時代》嘅一段戲，扮郭藹明對住做佢老竇嘅曾江，黃珮妍喺排舞房行出嚟雙眼通紅，問佢做乜，佢就話：「因為我投入，所以我做戲嘅時候就喊咗出嚟，當時我真係當對手死咗，咁就喊得出。」
而下晝，一班港姐又再接受跳舞考驗，評判吳美珩就帶領一班港姐跳舞，重教佢哋點樣擺姿勢，而就現場所見一班港姐真係雞手鴨腳，完全俾吳美珩搶晒鏡。
黎明呢輪事業發展完全冇勢，佢自己都頭痕，佢以前拍戲叫價成四百萬，但賣埠能力又唔係好高，所以片商都唔敢搵佢拍戲。
不過最近陳可辛籌備緊《甜蜜蜜》續集，男主角會搵番黎明做，但聽講黎明接呢部戲收得好平，只係收半價，因為佢好想憑呢部戲挽回聲勢。
無綫戲劇部副總監曾勵珍噚日舊曆生日，電視劇《皆大歡喜》一眾演員特別為佢開咗個生日會。有份出席嘅藝員薛家燕話：「喺電視城食我梗係搶住請啦！成班人買個蛋糕，都係心意。因為珍姐向來都好有人情味，我哋有事佢第一時間會慰問，我唔舒服佢又打電話嚟，而我哋做錯，佢都會第一時間打嚟，佢真係好好。」
同歌手盧巧音（Candy）拍咗拖十個月嘅余文樂，噚日喺九龍塘出席「太陽計劃2002」太陽使者開學禮，余文樂首次公開認同Candy分手，佢重三番四次咁話：「我同Candy分手唔關第三者嘅事，分開咗重係朋友。」
問余文樂會唔會同Candy保持聯絡？佢話：「我啱啱喺台灣返嚟，香港有好多工作等住要做，未來半年都會好忙。」
黃岳泰最近搞緊一部講DNA題材嘅戲，女主角想搵𠵱家韓國人氣最勁嘅女星全智賢，雖然佢叫價二百五十萬，高過好多香港女星，但搵佢拍戲，最起碼可以多一個韓國市場，男主角就想搵古天樂，不過古仔簽咗中國星，啲戲一部接一部，要搵佢拍戲除非中國星肯放人，早排英皇想搵佢拍葉偉信嗰套喜劇，但都冇放人。
伏明霞好友張鎧潼就嚟出唱片，佢噚日到黃埔新城娛樂台出席《聯Fan所》訪問，張鎧潼重即席以友人嘅出生日期做戀愛占卜。
張鎧潼話自幼已喜歡玩占卜，佢話：「我由細至大都鍾意睇星座書，我都考慮開占卜檔。但𠵱家我忙緊參與新碟嘅準備，我會幫手設計造型，但就唔會寫歌。」