大市雖然相當靜，不過仍有人走出嚟做配股。噚日小初收到有個唔多相熟嘅女經紀電話，話日東科技（365）批股，問小初想唔想要番啲，重話批股價較收市價有成10％折讓。不過，小初始終冇要到。
女經紀話，日東今次以先舊後新方式配股，每股作價93仙，配售3000萬股新股，集資2790萬元。
其實抽水金額唔多，真係一個人都坐得晒，佢走嚟搵小初，實在有多少離奇，加上呢排配股嘅股仔例如中國星（326）同埋創新發展（024）咁，復牌後表現都好普通，唔輸已經偷笑。
況且睇番日東嘅走勢圖，隻股早排一支箭咁升，由70仙炒上去最高1.18元，噚日收市價1.03元，10％折讓其實唔算多，所以都係費事手多多。其實重有一個重要原因令小初唔想沾手，就係隻股上市冇耐，就被天下第一莊嘅陰影籠罩住，所以點都有多少戒心。
慕容小初