無幾耐就係端午節啦，提醒啲腸胃唔算太好嘅朋友，咪暴食糭而搞到不適就無謂啦！即使腸胃多好亦要適可而止。食糭容易令人飽滯，所以我今次要介紹西柚畀大家作為飯後消化果，即使食滯都無有怕。西柚熱量低，纖維素卻極高，作為消滯或KeepFit絕對係良品。怕西柚苦澀味，認住呢款黃中略帶粉紅果皮嘅品種，食落比較清甜㗎！
$2.8/個 惠康超市有售
今年荔枝唔單止平，而且質素又靚。我嘴刁嘅老公話早幾日已經有糯米糍食，估唔到糯米糍提早大半個月上市，佢重話質素相當好，肉厚核細，汁多又甜美，最重要係價錢比去年平一成半有多。
市面有咁多荔枝，要揀正宗糯米糍，就必要留意以下幾點，正宗糯米糍顏色鮮紅、外皮較滑而唔攙手，肉厚核細，果肉非常甜，糖尿病者我建議咪食過量。
$12-$14/磅 各大果檔有售
東風螺原來有好多個名，好似鳳螺、蛾螺、象牙螺等，雖然喺食店容易食到，但街市反而唔係成日有得賣。所以呢排見到街市有得賣，我都唔執輸，買返屋企整。而且𠵱家嘅東風螺都幾大隻，比較好肉。買回去洗淨沙粒，可以炒食，也可以煲湯，清清哋都唔錯。而且價錢唔貴，都算經濟，買得過。
約$40/斤 各大魚檔有售
文：肥師奶