趙飛雲最初學賭馬，師傅教落逢大熱門都可以「飛」，估唔到原來用喺賭波亦一樣，今屆世界盃兩大熱門法國及阿根廷竟然初賽就出局，賭波公司已經賺到盤滿缽滿，講句好聽啲就波係圓嘅，但最貼切就係十賭九騙。體育歸體育，賭博歸賭博，撈埋一齊就錢作怪，即刻有辦畀你睇！
美股杜指周二破腳穿頭，走勢相當肉酸，納指更跌穿1500心理關口，但恒指噚日只跌67點，其實已經唔太受美股影響，趙飛雲現時主要持現金，跌市提供低吸機會。前日提過揀定Call輪等運到，係表示做定準備工夫，並非即時採取行動，相信恒指跌至11000附近先會有較明顯反彈。值得一提係7月底至8月中有相當多窩輪到期，由於時間無多，溢價太高嘅窩輪不宜沾手，否則淨係輸溢價已經難翻身，如果睇錯市更即時輸鋪勁。
恒指偏淡走勢暫時冇變，現階段都係睇波好過炒股，雖然法國同阿根廷已出局，可觀性大減，但重有巴西隊喺度，希望唔會未到決賽就出局。
鞍鋼（347）噚日再跌2仙，收1.23元。但由於成交實在太薄弱，缺乏參考價值，趙飛雲決定繼續揸貨，跌穿50日線1.19元才止蝕。
趙飛雲