唔知南韓教練軒迪克係咪俾勝利沖昏頭腦，家吓佢隊波都未知出唔出到線，但佢就好大口氣咁話，唔怕喺十六強對意大利。
雖則南韓家陣手執住四分，但係個形勢就唔係太好。事關佢哋如果喺最後一仗輸咗畀葡萄牙，而美國又和咗波蘭嘅話，咁就要返歸。雖然係咁，佢哋教練軒迪克對出線仍然好有信心，重話就算喺十六強對意大利，亦都冇有怕。
我求大俠亦認同做人應該有信心，但係軒迪克畀咁大希望啲南韓人，如果佢到時做唔到，因住由高麗英雄變咗狗熊。
丹麥同法國過去四次（唔計今次）喺大賽碰頭，贏波嗰隊最後會成為冠軍，所以有人話丹麥前日贏咗法國後，應該可以成為今屆世界盃冠軍。但我求大俠就唔係太認同，事關以丹麥𠵱家嘅實力，喺十六強對住英格蘭，贏面都唔高，咁又點攞冠軍呀！
阿根廷前鋒簡尼基亞認真離奇，喺今屆世界盃冇踢過一場波，就俾球證趕咗出場。事關佢老人家喺噚日對瑞典場波，完半場前喺後備席上鬧球證，結果就換來一面紅牌。雖然阿根廷有位職員諗住博懵自己行出場，但球證就冇俾佢呃到，最終簡尼基亞死死氣都要行出場。
計埋阿根廷在內，今屆世界盃已先後有兩支強隊出局，真係擔心意大利喺今日步法國同阿根廷嘅後塵。站在球迷嘅立場，梗係唔希望啲強隊出局啦，事關咁樣會影響賽事嘅可觀性。但係踢波就係咁，話知你好手如雲，踢得悅目，總之打得唔好，就要俾人一筆out消，咁先係比賽嘅吸引地方。
李維士早排喺場重量級拳賽贏咗泰臣，而英格蘭亦有機會捧世界盃，於是啲英國人就話如果漢文喺溫布頓攞男單冠軍，咁就perfect嘞。但漢文就向佢哋潑冷水，話自己同英格蘭都唔係攞硬冠軍。每屆打溫布頓頂多去到四強嘅漢文咁有自知之明，唔同人癲，認真夠清醒。