自從揭幕戰後，小記再次返回漢城工作，之前提及南韓政府為改善塞車煩惱，世界盃期間實施新交通管制措施，初步效果不錯；但一周後，塞車問題再現，小記又要重嘗塞車之苦。
噚日搭的士去漢城世界盃運動場採訪中國及土耳其操練，下午三點非繁忙時間小記就遇上塞車問題，二十分鐘車程要多一倍時間先到埗，真係等到一肚火。
同的士司機李慶洙閒話家常，佢好勞氣咁話今屆世界盃對的士司機乜嘢好處都冇，生意額不但冇上升；之前政府重要求所有漢城的士裝發票機，使咗成千港元，加埋每逢賽事期間，漢城道路四處封閉，去世界盃運動場除咗公共巴士外，其他車根本去唔到，近兩日連一個外國遊客都冇，真係慘情。
吞咗六蛋的國足被國內傳媒煲到雄心壯志，今對土耳其要入佢哋喺世盃決賽第一球，又話攞一分；其實中肯評論總好過盲目煽情；沉默是金總比自吹自擂的好，以免國足孭重飛腳軟。