好多人都會遇上無乜心水，亞洲盤唔知點落手嘅情況，呢個時候如果想玩少少增加睇波樂趣，不妨轉轉口味敲下「入球上/下盤」，玩法同樣係二揀一，有時重會好快就有結果，唔使等足全場。
以前「馬交」嘅賭波公司有種賭盤，叫做「獨贏+上/下盤」，玩法係要同時估到一場賽事入面嘅亞洲盤獨贏，以及兩隊總入球數嘅上、下盤（入球數等如兩球或以下嘅為下盤，三球或以上就為上盤）。不過，上季開始已經無咗呢支歌仔唱，兩樣嘢已經拆開咗嚟玩。
講到「入球上/下盤」呢種賭盤，並唔係間間賭波公司都有，外國嘅賭波公司只會提供比較傳統嘅入球總數賭盤，例如估入「○至一球」、「兩球至三球」、「四球至六球」，所以呢種「入球上/下盤」玩法就來得更方便；有時重會好快就有結果，例如D組嗰場葡萄牙對美國，只係踢咗三十六分鐘，捧入球上盤嘅就已經可以排隊收錢。
直到目前為止，今屆世界盃嘅每場平均入球數仍然維持喺兩球以上，睇番近幾屆每場平均入球數亦達到呢個水平，即係話只要每場都繼續博「入球上盤」，應該無乜走雞。
不過，今日打嘅四場波係C組同埋G組賽事，就似乎唔應該盲目咁追晒四場嘅入球上盤。綜觀呢兩組球隊嘅入球能力，同埋球隊之間嘅實力懸殊程度，C組兩場比賽都應該可以放手一博入球上盤，比較穩陣嘅係土耳其對中國。而G組嗰兩場波，就唔係太有信心開到入球上盤嘞，有意大利嘅比賽都唔慌會出現多入球；克羅地亞及厄瓜多爾亦冇乜入球板斧，如果入球下盤又唔敢博嘅話，寧願忍手不沾為妙。
文：華度