因為香港大學民調風波而黯然下台嘅港大前校長鄭耀宗，對教育都算不離不棄，佢老兄雖然已經淡出本港教育界，但就好積極咁開拓內地教育市場，繼續佢春風化雨嘅工作。
鄭耀宗離開港大後，去咗幫榮智健「打骰」嘅中信泰富做顧問，噚日喺一個午餐會上，佢就好風騷咁同八方等一班記者行家介紹由佢打理、設於上海嘅網絡教育公司。
佢話，呢間公司係由中信泰富斥資六千萬元，同上海復旦大學合作開設，主要搞網上教育。鄭耀宗又賣花讚花香咁話，呢類網上教育課程每年學費只係六千五百元，完成兩至四年課程後，可獲復旦頒授大學學位，都幾有發展潛力。
佢重好高興咁同八方講，課程喺上年九月開課時已收到三千幾名學生，今年將會更上一層樓，預計會收到三千五百名學生。唔知鄭耀宗係唔係對港大始終有一份「情意結」，佢老兄重將呢間教育網絡公司同港大做咗個比較，佢話：「港大每年都係收二千九百人，我哋就收到三千幾人嘞！」間接踩港大一腳。
傳真︰2623-9278
電郵︰