美股周二大跌，但港股與美股表現唔算太一致，港股噚日牛皮偏軟，恒指收報11147，跌67點，成交58億元。大市表現疲弱主要係因中移動（941）受壓，其他藍籌表現一般。
Cookie話，港府今日將宣布盈富基金（2800）發售額，一般估計會有80億元或以上，吸引到一批對沖基金打算搵食，因此短期後市將危危乎。大市成交好靜，但中移動重有成5.53億元成交，股價跌破24元關口，報23.85元，短線重有可能下試20元水平。
德昌（179）公布業績後，股價前日大跌近12％，但噚日高盛唱好，叫客戶趁低吸納。里昂則認為業績令人失望，叫客快沽，結果德昌股價出現好淡爭持，收市跌3.2%，報8.95元，成交有成3.8億元。ｉ師傅話，大戶呢兩日透過里昂沽咗唔少貨，里昂趁勢再出個唱淡報告，呢一仗打得相當漂亮。德昌股價確實調整咗唔少，唔少醒目錢都會趁呢個時候買貨。
華富（952）宣布5供3，集資2900－3129萬元，每股供0.015元，折讓幅度達50％，而包銷商又係大股東，擺明係大股東想借供股增持，短期內此股都好難有表現，直至供股有結果後才會有戲睇。
此股噚日復牌急瀉36.7％，收報0.019元，後市守唔守到0.015元都好成問題。
新確科技（1063）配售告吹，股價挫20.6％，傳聞市場對此股反應一般，炒家寧睇世界盃都唔睇佢。
阿 虎