馬主H收到「愛護動物協會」SPCA一封信，由馬主協會轉嚟嘅。馬主與SPCA有乜關係？唔通馬主要知道一啲愛護馬匹嘅常識，唔好與練馬師谷到啲馬流鼻血？
唔係，唔講馬主H都唔知，原來沙田馬房之內，有三四百隻貓，貓當然係用嚟捉老鼠嘅啦，馬房環境唔係冷氣寫字樓，冇老鼠出沒至奇，所以無貓不行。但貓兒繁殖太快，亦會造成問題。因是之故，馬會請SPCA幫忙，將啲貓「無性化」（desex）（即係閹割），喺六月二十三日舉行一個OperationCatnip，是日會將捉到嘅貓，送晒去馬會獸醫治療室，由SPCA人員、獸醫、獸醫助理等人為啲貓施手術。
馬伕已經受指示，盡量去捉貓，但捉貓並唔簡單，人力之外，亦需要物力。SPCA於是寫信畀馬主協會會員，要求佢哋捐錢買cattrap，放喺馬房，等啲貓跌落陷阱，由馬伕送去閹。
估唔到香港啲馬絕大部份都被閹割，馬房內外啲貓亦要閹，過往馬會捐贈畀SPCA唔少錢，現在請SPCA解決馬房內嘅貓，亦合道理。但馬主唔知道一個「捕貓器」（cattrap）要幾多錢呢？如果馬主唔捐錢嘅話，馬會會唔會唔買「捕貓器」呀？每個馬房擺兩個，都只係四十八個，每馬房擺十個，就二百四十個。呢筆錢馬會出得起啩？馬主每個月支付兩萬幾至三萬幾養馬費，捉貓都要自己畀錢？