英皇新人周英杰（Bernard）前日二十六歲生日，英皇老闆楊受成對呢個屬龍嘅新人都好重視，特登喺跑馬地駿景酒店為Bernard開生日會。
除咗楊受成同英皇旗下新人歌手到賀外，Bernard嘅契爺大律師清洪、林建岳、寰宇集團主席林小明同埋星皓老闆王海峰都畀面出席。
Bernard喺生日會上收到楊受成送畀佢嘅銀包做賀禮，因為Bernard好大頭蝦，成日唔見銀包，Bernard話會好珍惜老闆送嘅禮物。Bernard嘅經理人霍紋希重同Bernard講，話佢大個仔一定要飲少少酒，所以Bernard都破例飲番杯。至於生日願望，佢就希望身體健康，唱片大賣喎。
早幾日喺太空館上映嘅電影《迷離警界之鬼車》，馮仁昭見到有個都幾性感、着住露背裝嘅靚女出現，佢話畀馮仁昭聽佢個名叫做殷穎珊，做緊模特兒，𠵱家想全力進軍娛樂圈，最想拍電視劇。馮仁昭覺得雖然佢嘅條件都唔差，但就唔係好突出，闖娛圈都唔係一件容易嘅事。
台灣三人女子組合S.H.E，早排推出第二張國語大碟，佢哋所屬嘅Avex唱片對新碟銷量非常滿意，所以特登安排佢哋喺下個禮拜五（二十一日）嚟香港宣傳三日，佢哋重會喺青衣城舉行迷你音樂會。而S.H.E做完音樂會後，就會即刻趕返台灣，錄佢哋第三張大碟。
周麗淇最近做咗WeagasBeauty嘅代言人，佢話呢間公司唔係美容減肥公司，而係按摩中心。周麗淇平日都好鍾意按摩，所以今次佢既可按摩，又有錢賺。周麗淇重話：「呢排咁多新聞，證明藝人嘅壓力真係好大，我平時唔多去夜街亦唔去蒲，反而鍾意去按摩減壓，沖番個涼、做吓spa，真係好舒服。」
向華勝同張玉珊拍拖後，佢兩個拍住上搞纖體美容生意，𠵱家向華勝又代理咗幾隻中藥，準備喺香港推出。聽聞佢準備主力谷其中一隻生髮水，不過價錢都賣得幾貴，一樽要幾千元以上，不過向華勝賣花讚花香，話只要消費者試過有效果，就唔會覺得貴。
早前有傳陳寶蓮（Pauline）有咗四個月身孕，最近佢一直住喺上海，台灣噚日重有消息話Pauline會喺十月生BB，重話佢曾經同台灣啲朋友證實咗㖭！而據佢台灣啲朋友講，BB嘅爸爸𠵱家喺美國，得二十五歲，不過唔係上海照顧緊佢嗰個男友喎。
劉嘉玲前日去咗北京公幹，佢接受內地傳媒訪問時，透露佢十八歲嘅時候好渴望有一段美滿婚姻，有個好錫自己嘅老公，但等到𠵱家佢都重未結婚。嘉玲重話佢認為梁朝偉係個好男人，對女人負責任，對事業同埋工作都一樣咁負責。至於偉仔同張曼玉嘅緋聞，嘉玲話只係宣傳噱頭，佢同偉仔關係好穩定。
吳鎮宇原本同導演鍾繼昌搞緊部以法庭為背景嘅愛情片，佢兩個最初諗住一齊做聯合導演，但後來因為鎮宇要專心幫TVB拍劇，要放棄搞部戲，結果搵咗陳果幫手。陳果已經幫佢哋再修改吓個劇本，又幫手聯絡演員，聽講有兩間公司對部戲都好有興趣，等陳果傾好啲演員陣容，希望九月可以開戲。