呢日在一個教育機構，碰到一位中學校長，講完正經事，閒談之際，知道佢出生於澳門，嚟香港讀大學，成為香港居民。好似佢咁嘅背景嘅人士，左丁山認識十幾位，呢班喺澳門讀中學嘅老友記，個個都係人才。
校長話：「我以前讀浸會，有好多來自澳門嘅同學，但近十年間，澳門生留學香港嘅，愈來愈少，澳門生往中國、台灣升學，有錢啲嘅去美國、澳洲，雖然港澳兩地一水之隔，想嚟香港讀大學就好難。」澳門、香港雖同是中國城市，但根據香港法律，澳門屬於「境外」，賭馬賭波都唔准去境外打電話啦，跨境入學更難。香港八大學有境外學生配額，目前就全部畀晒大陸學生（來自清華、北大、復旦、交通等名校），冇考慮到澳門，好對唔住。依左丁山之愚見，兩位特首華叔以及驊哥應該本着同是一國領土嘅共識，解決呢個「境外」問題，促成兩地嘅文化、經濟融合。
中學校長話：「澳門中學係六年制，與香港唔同，啲學生唔考高級程度試，所以難與香港銜接，真可惜，現在惟有望二○○七年或以後，香港廢除中學七年制，實行六年制，與中國、台灣及澳門看齊，澳門生先至比較容易啲嚟香港。
當然事事都有例外，叻仔叻女到處都受歡迎，校長知道一位澳門生憑GCE成績及托福試超高分（六百幾、七百），得到中文大學取錄，成績好嘅澳門生，大可依樣畫葫蘆。