德昌（179）晏晝派成績表，賺少24%，股價即散，碌低12%。同係「美國出口概念股」嘅利豐（494）跟住跌低，唔見7%。
結果德昌3件Call輪同利豐3隻Call輪，總共6件，隻隻沉，全部上晒死火榜。
德昌輪9185、9274、9279，兩件瀉5成，1件散28%，全部創新低不在話下。如果貪平，想博反彈，只有9185值得諗吓。9185有兩個月玩，現價0.63元，溢價10.6%，槓桿率14.7倍。兩個月內，德昌彈番1成幾，揸9185有得賺。其他兩件，溢價過高，間中跟正股彈吓彈吓唔出奇，但到尾都係好難有得剩。
利豐輪9015、9186、9301，跌幅依次係45%、24%同19%。手痕想博反彈，最穩陣係揀9186，有兩個月以上時間，現價26.5仙，溢價1%，槓桿率4倍。
9015呢1件，則比較適合搏殺型炒家玩，下月底夠鐘，現價0.64元，溢價8.2%，槓桿率16.4倍，唔係冇乜機賺錢。利豐係基金佬舞上舞落股份，失驚無神踢番上去，反彈十零個巴仙，揸隻輪就有肉食。
章盛