今屆世界盃認真刺激，賽果經常出人意表，情況同跑馬差唔多，好多熱門隊伍大打海鮮波，唯一係上屆冠軍法國最穩定，由頭衰到尾，捧場客心翳兼荷包傷，一個唔該中國隊迫和土耳其，大家都係半斤八両。
港股繼續靜英英，恒指則繼續尋底，早市一度低見11176，恒指最後跌73點，收11215。雖然恒指叫做守住11200支持，但就俾人感覺危危乎，目前個個顧住睇波，冇乜人入市，大戶苦無對手，暫時冇誘因將個市大幅推上推落，恒指應該維持窄幅上落。
圖表上，大市持續整固，但亦有見底迹象，趙飛雲睇波之餘，亦開始揀定啲藍籌輪，準備大市一旦結束調整，開始回升時就飛身追入，稍後會同讀者分享心得。
鞍鋼（347）噚日窄幅上落，下跌2仙，收1.25元，由於成交太少無啟示，暫時仍然揸住先。
早排曾經提過嘅光通數網昨日起改名為御泰國際（155），正式成為公司嘅旗艦。隻股過去兩個多月主要喺1.9至2.1仙區域橫行，據聞改名之後好快會有連串動作，將打破橫行悶局，可開始留意收集。
趙飛雲