喺剛過去嘅星期日（6月9日），紳寶汽車兩位高級工程師，親臨香港中環添馬艦，表演咗一場驚心動魄嘅特技飛車，當中包括有車貼車走S形路、交叉走位同埋高速甩尾等等，全都叫在場參觀人士拍案叫絕。
據其中一位高級工程師表示，佢哋並唔係話要表演高難度飛車，而係模擬出實際發生意外時嘅情況；同時佢又指出紳寶嘅汽車設計係以操控樂趣為主，喺類似嘅汽車失控情況下，車架同懸掛設計相當重要，如果設計精良，駕駛者才可安全將車停下，而且唔會造成驚險嘅失控場面。另外，現時好多車都會裝有ESP等電子系統，但其實呢類電子安全系統，都要講求車架同懸掛嘅配搭才可發揮效用。而用作表演嘅9-3係無經過特別改裝，咁即係證明紳寶嘅車架設計，無論係操控抑或安全性都係十分出色。同場亦備有廠方標準嘅ABS測試，當中分為有ABS及無ABS兩個模式，參加者可在同一濕滑嘅情況下，感受到ABS嘅好處同正確使用方法；值得一提嘅係，原裝紳寶汽車嘅制動系統經過在場50位參加者三次（即連續150次及無冷卻空檔時間）嘅高速急煞測試後，雖然制動器已有白煙出現，但最後仍有高達9成嘅制動力，認真厲害。