世界盃效應下，港股成交萎縮，但唔代表市場對任何消息都冇反應，市場雖然早已預期德昌電機（179）噚日公布嘅業績好差，但實際業績較預期更差，嚇怕班街坊，芬佬唔理三七廿一，沽咗貨先再講。
由於買德昌主要係睇好美國復甦概念，因此利豐（494）亦不能幸免，同遭拋售，前者跌12％，收9.25元，成交達3.5億元；而後者亦挫7.5％，收10.50元，成交1.2億元。
市場開始關注新一季盈富基金（2800）會推出幾多，若按五窮六絕七翻身嘅理論，6月多數會好靜，但下個月基金會重新部署，市況應該會轉旺，政府唔趁呢個時候出貨，重想等幾時？根據未經證實消息，發行額應該會達80億元。
中國太陽神（512）本來傳聞話會與中科院有大動作，公司6月4日開始停牌。噚日復牌，點知原本想購入嘅生物科技項目，最後傾唔掂數，交易隨即終止，令股價急挫14.8％，不過成交唔大，後市可能重有得玩。Cookie話，據聞公司洽購緊嘅項目唔止一單，呢項唔掂可以傾過第二項。
黑客叫阿虎要留意萬能國際（305），該股計劃同母公司合作搞東南亞賭業，若計劃落實，一定吸引資金落注。如果大家唔善忘，應該記得友力投資（674）曾經話要透過合營公司競投澳門賭牌，股價即時急升，公司重順勢抽埋水；嘉華系亦因大股東呂志和私人投得澳門賭牌而勁升。賭業似乎係繼生化科技股後另一熱炒主題。
其實港府不如將第二批地鐵（066）股份收埋唔賣，轉而即時將馬會上市，或者可足夠填補1年財政赤字。
阿虎