今屆世界盃賽事喺亞洲舉行，對於歐洲及其他地區球隊嚟講，響日間作賽或多或少都會有影響，連帶亞洲盤路唔同嘅開賽時間，都會有唔同嘅走勢。
眾所周知響晏晝兩點半開波嘅比賽（日本及南韓時間三點半），正正係烈日當空嘅時候；就算落雨，點都會有番廿幾卅度高溫，對於好多歐美球隊嚟講真係唔易適應，呢一點亦有好多人提及過。
相對於晚上進行嘅比賽，呢啲日場嘅戰果往往就可能因為呢個天氣因素，而變得比較反常，下盤開出嘅比率較為高；至於夜晚七點半（日本及南韓時間八點半）開波嘅比賽，就傾向多開上盤嘞。
連續兩日講咗啲盤路統計上嘅得意嘢，希望畀到各位參考之用。𠵱家已經打緊最後一輪分組賽，每日都會有四場比賽進行，啱晒鍾意玩過關嘅朋友出擊。今日嘅四場波，本報四位名家已經響另文畀晒啟示大家，響度就研究吓大家鍾意用來過關嘅歐洲盤，又有乜嘢玄機或者路數。
講到過關，最受歡迎嘅都莫過如三串四，本錢四注就可以玩到三場波，中正重有十幾廿倍分頭㖭。不過好多人都會忽略咗，其實你係落咗四注，嗰中正賠率就算有二十倍，都只係贏到五個開咋！
重有就係過關嘅嘢，每拖多一關就會多一個風險，𠵱家每日都係得四場選擇，唔係咁有心水嘅話，我就寧願玩二串一，隨時都搵到五倍啦，重可以分開「兩回合」（日、夜場）作戰㖭。 文：華度