如果英格蘭攞到今屆世界盃，睇怕最大功臣唔係佢哋領隊艾歷臣，而係曼聯領隊費格遜至真。
話說英格蘭中場碧咸日前話，自己除咗日日同老婆維多莉亞煲十幾次「粥」外，原來重有同佢個曼聯老細費格遜通電。不過，各位咪誤會碧咸同老費有曖昧關係，其實老費只係過料畀碧咸，教佢點樣可以打好啲。
事關家吓喺法國度假嘅老費，見到碧咸對瑞典場波，踢咗半場就喘晒氣，就打電話畀碧咸，教佢點喺比賽留力。結果碧咸喺之後對阿根廷嗰場波，唔單止打足全場，而且重射入一球，幫英格蘭贏波㖭。
另外，老費重有同史高斯同畢特訓話，唔怪得佢哋兩個喺對阿根廷場波，同碧咸一樣打得咁好啦！之但係，如果俾艾歷臣知道老費遙控緊佢班球員，唔知會有乜嘢感受呢？
雖然明知球隊出局重要繼續比賽，有時的確好難受，不過我求大俠就覺得尼日利亞前鋒簡奴話自己隻腳有傷，隊醫都冇話佢唔對得英格蘭，自己就話唔踢。畢竟代表國家已經係值得驕傲嘅事，重有得喺世界盃上陣就更加光榮，實在唔知簡奴點諗。
中國篤定出局後受冷落
喺中國篤定出局後，採訪佢哋嘅記者愈嚟愈少，好似當佢哋去到漢城嗰時，入住嘅復興酒店表明唔會有歡迎儀式，唔怪得之教練米路天奴域慨歎人情冷暖。不過計我求大俠話，中國隊唔需要理會呢啲嘢，一於繼續打好波，啲捧場客就自然番嚟㗎啦！
法國提早畢業，巴西中場祖連奴即刻整句唔知算攞景定贈興嘅說話，畀法國佬歎，佢話：「慘囉，無得報上屆決賽一箭之仇㖭。」我求大俠記得法國喺揭幕戰輸波之後，巴西傳媒即刻狂踩法國隊，今次輪到祖連奴落井下石，都咪話巴西人唔記仇。
講開法國隊，雖然佢哋咁早就俾人踢出局，但係佢哋啲球員冇話咁而發爛渣，繼續保持職業球員應有嘅風度，喺賽後向入場打氣嘅球迷拍掌致意。重有，佢哋班球員亦冇因為輸畀丹麥，而唔肯同丹麥球員交換波衫。
身為國家首相，當然要日理萬機，不過，日本首相小泉純一郎就每逢日本隊有波踢時都去捧場，重自誇為日本嘅幸運星，咁就搞到國會有啲議員唔多like佢，重叫佢要做好份內工作先，下場日本對突尼西亞時，就最好唔好去捧場喇！