講真一句，自從世界盃開鑼之後，小初一班經紀朋友個個都無心炒股，因此報嘅料質素差咗好多，雖然小初都鍾意睇波，但係就冇佢哋咁瘋狂，掛住睇波連市都唔得閒睇，小初仍然深信，搵錢大過天。
小初噚日撞到年輕賓架，佢話有一隻日日１仙淨沽嘅股仔401控股（401），最近有個資深賓架入咗董事會，唔排除係公司重組先兆。佢重話呢位資深賓架以往喺一間歐資行工作多時，搞親都係億億聲嘅大deal，年前佢轉投銀網（622），但收尾銀網賣咗畀百仕達（1168），佢亦辭咗董事職位。
年輕賓架又話，市場傳聞401會搞股本重組，首先當然係併股，皆因家陣發行股數成百幾億股咁多，稍後可能會同現時最當紅嘅上海幫合作，印公仔紙收購番多少project，跟手就搞埋變身。
雖然年輕賓架講嘅嘢聽落好似好堅，但搞親重組都唔會一時三刻搞得掂，小初都係等佢落實先再諗。
慕容小初