有線電視大手筆，使咗大嚿銀紙獲得世界盃獨家播映權，其實可以安份守己齋播賽事已經唔憂冇人睇，雖然今屆踢日波，但要睇嗰班始終都一定會睇，但有線電視要發圍兼起啤，唔止播波，重要每晚搞個「騷」，結果找來了達明跟我。
有線電視搞大「騷」的經驗並不是十分豐富，所以這是一個十分「狼」的決定，難度在於要整個月每晚不停播，大家疲於奔命之餘還要沒有空閒綵排，唯一辦法是事前工夫做到十足，台前幕後的大夥兒很早便投入了籌備工作，我與達明亦有份參與創作過程。如今節目已每晚出街，坊間有人喜歡也有人不喜歡，但無論如何，熱鬧的party氣氛自問是做到了，這全是大夥兒群策群力，一條心想做件事的成果。
這件差事對我來說是着數非常，點都好，世界盃橫掂我都會睇足，如今有人工收不特止，重有機會到韓國在講波廂現場睇準決賽，開心到咩咁，在講波廂睇世界盃是我兒時的心願之一，希望下一屆可以睇埋決賽。
接這差事的另一個原因是因為有達明，認識此君已有幾年，初相識不久便已將之歸入好朋友類，直至《FM701》，正式由好朋友晉升為好拍檔。達明表面上懶懶閒閒，實際上亦頗懶懶閒閒，但只要一踏上舞台，態度馬上變得認真，是一個很可靠的對手，二人已建立了良好默契，除了記自己的稿，也會替對方記，間中他「斬」一球傳中波讓我頂，偶爾我又會做個單擋讓他取分，那種不計較的氣氛很舒服，在舞台上站在達明旁邊很有安全感。
好朋友難尋，好拍檔更難求，如今覓得達明君，心願已足矣。