韓戰地手記：今屆世界盃撲飛最容易

每一屆的世界盃決賽周都令人期待，球迷可以為一張球票不惜露宿街頭排隊，之不過今屆比賽有唔同，好多時臨場都可以買到，而且還是「賤價飛」，就連記者席波飛都比以前更容易攞到。

韓美大戰記者席有空位
雖然現時只進行分組賽事，但到過南韓幾個比賽球場，都唔再見到好似上屆一樣，記者喺比賽前蜂擁圍住大會工作人員，爭住攞飛，又投訴安排不妥嘅混亂情況；好似南韓周一對美國這場當地傳媒十分重視嘅賽，記者席依然有空位剩，真係估唔到。
其實，今屆比賽史無前例分散喺二十個城市舉行，搞到記者都好少同時間聚集喺相同城市，亦唔使一早去到球場霸位、霸電線插頭位駁電腦打稿。

南韓傳譯做得最好
講開南韓賽會工作人員今次協助記者解決工作上的問題，算係唔錯，態度十分親切，可能大家都係亞洲人關係，而有懂不同語言嘅工作人員服務，始終都係今次南韓組委會做得最好一項，真係做到佢哋嘅宗旨（KoreaWelcomeWorlds）。